Arnaud köyü ~ آرناؤد كويي
Kamus-ul'Alam - Arnaud köyü ~ آرناؤد كويي maddesi. Sayfa: 149 - Sira: 2
Arnaud köyü - آرناؤد كويي
بو نامله روم ایلی واناطولیده بر قاچ كوی بولنوب، اك مشهورلری بوغاز ایچنده كی آرناؤد كوییدر. بو قریه بوغاز ایچنك روم ایلی طرفنده، قورو چشمه ایله ببك آره سنده واقع اولوب، اصل قریه بر دره نك ایچنده اولمغله، هواسی پك ایی دكلسه ده، غرب جنوبی طرفنده تپه لرده بولنان بعض كوشكلر ویالیلرك هواسی معتدل؛ وآقندی برونندن یوقاری اوله رق شرق شمالی طرفنده كی یالیلر ایسه بسبتون پوراسه قارشی اولمغله، هوالری سرتدر. آرناؤد كوینك اولدقجه چارشیسی وهر اصنافدن دكانلری ومغازه لری، كوزلجه بر جامع شریفی ایله ٤ روم كلیساسی و ٣ صبیان مكتبی وبر بیوك قره قولی واردر. آقندیسی غایت شدتلی اولوب، آقندی برونندن یوقاری ببكه قدر منتظم بر ریختمی وریختمك اوزرنده بر چوق قهوه وقازینولری بولنمغله، یازین بر تفرجكاهدر. بوریختمك اوزرنده بر اسكی سرایك خرابه لری وبر سلطان ساحلخانه سی بولنیور. آرناؤد كوینك اكثر اهالیسی روم اولوب، خیلی اسلام وارمنی دخی بولنور. اوچ سنه مقدم قریه نك بر بیوك قسمی محترق اولوب، الآن ابنیه سی یاپیله مامشدر. بوقریه نك خانه لری ٢٥۰۰ واهالیسی ٧٥۰۰ قدردر. جوارینك چیلكی مشهوردر. _ دیكر آرناؤد كویلرندن بری بكقوزدن درت ساعت ایچریده مرتفع بر محلده واقع بر قریه در، كه بر ایكی یوزخانه یی شاملدر. _ بری ده ادرنه ولایتنده دده آغاج سنجاغنك اینوز قضاسنده واینوز شهرینك ٢٥ كیلومتره قدر شرقنده ومریجك اینوز كورفزینه منصب اولان شعبه سنه دوكیلن بر اوفق دره نك ساحل یسارنده واقعدر.
Kamusul Alam, Şemseddin Sami; Kamusul Alamde Arnaud köyü maddesi. osmanlıcada Arnaud köyü ne demek, Arnaud köyü anlamı manası, Arnaud köyü osmanlıca nasıl yazılır. Osmanlıca sözlükte Arnaud köyü hakkında bilgi. Arapça Arnaud köyü ne demek. Arapça osmanlıca sözlük. Farsçada Arnaud köyü anlamı
Kamusul Alamde - آرناؤد كويي Arnaud köyü maddesi. Şemseddin Sami, Kamusul Alam Ansiklopedisi