Ebul Ferec Esfihani - ابو الفرج اصفهانی

(علی بن حسین اموی) مشاهیر ادبادن اولوب، (كاتب اصفهانی) اسمیله دخی مشهوردر. ملوك امویه نك اخیری اولان مروان حمارك نسلندن اولدیغی حالده، غراىٔبدن اوله رق، شیعی المذهب ایدی. ادبیات عربیه ده و حفظ اشعار و اخبار و سیر و انسابده عصرینك و حیدی اولوب، حدیث و نحو و لغتده دخی ید طولی صاحبی ایدی؛ وطب و نجومدن وساىٔر علومدن دخی بهره سی وار ایدی. ٢٨٤ تاریخنده اصفهانده طوغوب، بعده بغداده هجرتله، اوراده نشأت، و ٣٥٦ تاریخنده وفات ایتمشدر. وزیر مهلبی یه منسوب اولوب، بونك مدحنه داىٔر بر چوق اشعاری واردر. تألیفاتی بونك مدحنه داىٔر بر چوق اشعاری واردر. تألیفاتی چوق اولوب، اك مشهوری ٢۰ جلددن مركب وادبیاتده مثلی نایاب اولان ((الاغانی الكبیر)) عنوانلی اثر قیمتداریدر، كه مدنیت اسلامیه نك اك پارلاق دورینك احوالنی دخی مصور اولمغله، آوروپاجه دخی شهرت و اعتباری بر كمالدر. بو كتاب ١٢٨٥ تاریخنده مصرده بولاق مطبعه سنده صورت مصححه ده طبع و‌ نشر اولنممشدر. دیكر آثاری بروجه آتیدر : ((كتاب القیان))، ((كتاب الاماء الشواعر))، ((كتاب دعوة الاطباء))، ((اخبار حجظه البرمكی))، ((مقاتل الطالبین))، ((مجرد الاغانی)) ،‌ ((كتاب الحانات))، ((آداب لغرباء))، ((كتاب الدیارات)) بونلردن بشقه او وقت اندلسده حكومت سورمكده بولنان ملوك بنی امیه نامنه بر چوق كتابلر یازوب، خفیاً‌ كندیلرینه كوندرمش؛ و مقابلةً كندیسنه اورادن بر چوق احسانلر كلمشیدی. اندلسده شهری بولان بو كتابلرینك باشلیجه لری شونلردر : ((كتاب نسب بنی عبد شمس))،

((كتاب ایام العرب))، ((كتاب التعدیل و الانتصاف فی مآثر العرب و مثالبها))، ((جمهرة النسب))، ((كتاب نسب بنی شیبان))، ((كتاب نسب المهالبة))، ((كتاب نسب بنی تغلب و نسب بنی كلاب))، ((كتاب الغلمان المغنین)).