Ebul Hasen Merini - ابو الحسن مرينی

(علی بن ابی سعید عثمان) مغرب اقصاده یعنی فاسده حكم سورن بنی مرین ملوكنك اك بیوك و اك مشهوری اولوب، طرابلس غربه قدر بتون آفریقای شمالی یی و اندلسك بر قسمنی قالمروی داىٔره سنه ادخال ایتمشیدی. پدرینك وفاتی اوزرینه، ٧٣١ تاریخنده تخته جلوس ایتمش؛ و ٢١ سنه سورن مدت سلطنتنی محاربه ایله كچیروب، اندلس خرستیانلریله ایتدیكی محارباتك بر ایكیسنده مغلوب اولمش؛ و حتی اسپانیوللر حرمنك بولندیغی سرایه مستولی اولوب، فوق العاده سودیكی زوجه سی فاطمه یی (كه بنی حفصدن ابو یحیانك قیزی ایدی) و عمیجه سنك قیزی عایشه یی و بر چوق نسوان و اطفالنی قتل ایتمشلردی. نهایت تونسده كلی بر انهزامه اوغرایوب بحراً عودت ایدركن، ٦۰۰ كمیدن عیارت اولان دوننماسی و ایچنده بولنان عسكریله ٤۰۰ علما وساىٔره غرق اولوب، كندیسی بر تخته یه یاپیشه رق، كوز حال ایله ساحله چیقه بیلمش ایدی. بعده اوغلی ابو عنان عصیان ایدوب، واقع اولان محاربه ده غالب كلمكله، ابو الحسن استیمان ایتمش؛ و متعاقباً ٧٥٢

تاریخنده وفات ایتمشدر. غایت جسور و فعال بر پادشاه اولوب، شهرت وشانه و درات و دبدبه یه زیاده سیله ماىٔل ایدی. مصر حكمداری ملك ناصر محمد بن قلاوونه غایت ذی قیمت بر طاقم هدیه لر كوندرمش؛ و كندی الیله یازدیغی بر مصحف شریفی فوق العاده صورتده تزیین و تزهیب ایده رك، هدایای ساىٔره ایله برابر حرم شریفه اهدا یتمشیدی. سودان حكمدارلرندن (منساموسی) و بعده اوغلی (منسا سلیمان) ایله دخی هدیه لر تعاطی ایتمشیدی. آفریقای شمالیده خیرات و اعماراتی چوق اولوبي ازآن جمله تونسك جهت غربیه سنده (منصوره) اسمیله یكی قصبه، مغرب اقصانك (مكتاسه) شهرنده بیوك و مكمل بر مدرسه و بر چوق كوپریلر، قلعه لر، زاویه لر، چشمه لر و ساىٔره تأسیس و بنا ایتمشدر.