İbni Malik - ابن مالك

(ابو عبدالله جمال الدین محمد بن عبدالله) مشاهیر نحویوندن و كبار ادبادن اولوب، صرف و نحو ولغتده بینظیر اولدیغی كبی، اشعار عربه دخی واقف اولوب، بو اوچ علمده استشهاد مقامنده ازبردن بر چوق اشعار مشاهیر ایرادینه مقتدر ایدی. اندلسك (جیان الحریر) (قصبه سنده ٦۰۰ تاریخلرنده طوغوب، بعده شرقه رحلتله، عصرینك مشاهیر علماسندن اخذ وقراىٔت و علی الخصوص لسان عربینك غوامض و حقایقنه واصل اولمق ایچون، پك چوق جهد و غیرت ایده رك، فضل و كمالیله كسب شهرت ایتمش؛ و دمشقده مدرسۀ عادلیه ده تدریسله و امامتله اشتغال ایتمشدر. او وقت دمشقده قاضی القضاة بولنان مورخ مشهور ابن خلكان صاحب ترجمه یه بر درجه ده حرمت و رعایت ایدردی، كه بعدالصلات هر كون كندیسنی جامعدن خانه سنه قدر تشییع ایتمكی عادت ایدنمشیدی. ابن مالك اندلسده ایكن مالكی ایدیسه ده، شرقه هجرت ایتدكدن

صكره مذهب شافعی یه انتساب ایتمشیدی. نظم و شعری دخی لطیف و سلیس ایدی. اك مشهور اثری علم نحوه داىٔر اولان ((الفیه)) عنوانلی منظومه سیدر، كه اصل اسمی ((الخلاصه)) در. تصانیف ساىٔره سنك باشلیجه لری شونلردر : نحوه داىٔر ((تسهیل الفواىٔد))، ((الموصل فی نظم المفصل))، ((سبك المنظوم و فك المختوم))، ((الكافیة الشافیه)) ، ((اكمال الاعلام بمثلث الكلام)) ، ((لامیة الافعال))، ((فعل وافعل))، ((المقدمة الاسدیة))، ((عدة اللافظ و عمدة الحافظ))، ((النظم الاوجز فیما یهمز))، ((الاعتضاد فی الظاء والضاد))، ((اعراب مشكل البخاری))، ((تحفة المودود فی لامیة الافعال)) ، ((شرح كافیة الشافیه)).