İbni Kils - ابن كلس

(ابو الفرج یعقوب بن یوسف) فاطمیوندن عزیزك وزیری ایدی. عن اصل بغدادلی اولوب، یهودی المذهب ایدی. ٣٣١ تاریخنده پدریله برابر مصره رحلت ایده رك، كافور احشیدینك بعض رجالنه و بعده كندیسنه انتسابله، امور حسابیه سنه و كتابتنه مأمور اولمشیدی. روایته كوره او صره ده شرف اسلامله مشرف اولمشدر. بعده كافورك وفاتنده، وزیری ابو الفضل جعفر بن فراتك ذاتك صاحب ترجمه یه غرض و حسدی اولدیغندن، كندیسنی حبس ایتمش ایسه ده، ابن كلس اموال كثیره اكتساب ایتمش اولدیغندن، رشوت ویره رك، كندینی قورتارمش؛ وقورتلنجه، مغربه كیدركن مصری ضبط ایتمكه كلمكده اولان معزعبیدی یه راست كله رك، معیتنده عودت ایتمش؛ و معزك رجال و مقربینندن اولوب، فوق العاده نفوذ واقتدار كسب ایتدكدن صكره، معزك اوغلی عزیزك زماننده، ٣٦٨ تاریخنده مسند وزارتی احراز ایتمشدر. داىٔره سی مجموع علما و فقها اولوب، خوان نعمتی عمومه آچیق ایدی. ٣٧٣ تاریخنده عزیزك توجهنی غاىٔب ایدوب، حبس اولنمش ایسه ده، بر سنه صكره اطلاق و مقام وزارته اعاده اولنمش؛ و ٣٨۰ تاریخنده وفات ایتمشدر.