İbni Ibad - ابن عباد

(صاحب ابو القاسم اسماعیل _ ) مشاهیر وزرا و ادبادن اولوب، آل بویه دن مؤید الدوله نك و بعده برادری فخر الدوله نك وزیری ایدی. كرم و سخا و علوم جنابده بینظیر اولدیغی كبی، علوم متنوعه و شعر و ادبیاتدن دخی بهره مند اولمغله، داىٔره سی مجمع علما و فضلا اولمشیدی. علمای معاصرینیله اولان ماجرالری و احسان و كرمنه متعلق حكایات و نوادری مشهوردر. آل بویه دولتنده اك اول (صاحب) عنوانیله یاد اولنان وزیر صاحب ترجمه اولوب، مؤید الدوله نك كوچكلكندن بری مصاحبی بولنمق مناسبتیله بو عنوانه مظهر اولمش؛ و كندیسندن صكره صاحب عنوانی دولت مشارالیها وزراسنك جمله سنه تعمیم اولنمشدر. عن اصل طالقانلی اولوب، ٣٢٦ تاریخنده طالقانده و بر روایته كوره اصطخرده طوغمش، و ٣٨٥ تاریخنده (ری) ده وفات ایتمشدر. حقنده اعاظم شعرا طرفندن سویلنمش مدحیه ومرثیه لرك حدوحسابی یوقدر. لغته داىٔر ((المحیط)) عنوانیله ٧ جلد اوزره بیوك بر تألیفی، بعض منشآتی جامع ((الكافی)) عنوانیله بر كتابی، ((كتاب الاعیاد و فضاىٔل النیروز))، ((كتاب الامامة))، ((كتاب الكشف عن مساوی شعر المتنی))، ((كتاب اسماء الله و صفاته)) عنوانلریله اثرلری و مرتب بر دیوان اشعاریله بر مخابرات مجموعه سی واردر. ساىٔر آل بویه رجال كبی شیعی المذهب و معتزله دن بولنمش اولدیغی مرویدر. (كافی الكفاة) لقبیله دخی ملقبدر.