İbni s Sabuni - ابن الصابونى

(جمال الدین عبدالرزاق بن احمد) مشاهیر علمادم اولوب، حدیث و تاریخ و حكمتده ید طولی صاحبی ایدی. ٦٤٢ تاریخنده طوغوب، ٧٢٣ ده وفات ایتمشدر.روایته كوره، (معن بن زاىٔدة الشیبانی) نك نسلندن اولوب، بغدادك هلاكو طرفندن ضبطی صره سنده مغوللرك قید اسارتنه دوشمش، و كوله صفتیله حكیم مشهور نصیر الدین طوسی یه ویریلوب، مشارالیهدن

تحصیل علوم و فنون ایتمش؛ و حسن خطی دخی اولمغله، كرك نصیرالدینك آثارینی و كرك ساىٔر كتب كثیره استسناخ ایلمشیدی. مراغه ده حكیم مشارالیه طرفندن تأسیس اولنان رصدخانه ده استخدام اولنمش؛ و بعده بغداده كیدوب، مستنصریه كتبخانه سنك حافظ كتبی اولمش؛ و بو خدمتده ایكن، تواریخ كثیره مطالعه ایده رك، علی الخصوص تراجم احوال حقنده معلومات واسعه استحصال ایتمشیدی. تراجم احوالی جامع اولمق اوزره ، ((مجمع الآ داب فی معجم الاسماء علی معجم الالقاب)) عنوانیله ٥۰ جلددن مركب بر بیوك كتابی، ((درد الاصداف فی غررالاوصاف)) عنوانلی ٢۰ جلدلی بر تألیفی، ((تقلقیح الافهام فی المؤ تلف و المختلف)) عنوانیله بر اثری، ابتدای خلقتدن بغدادك خرابنه دك بیوك بر تاریخ عمومیسی، ((الدررالناصعه فی شعراألماىٔمة السابعه)) عنوانلی بر تذكره سی و عربی وفارسی بر چوق اشعاری واردر.