İbrahim Bİn Ağleb - ابراهیم بن اغلب

ایكنجی عصر هجریده افریقه ده تأس ایتمش وبر چوق فنوحاته موفق اولمش اولان بنی اغلب دولتنك بانیسیدر. سالم بن اغلبك اوغلی اولوب، بونك پدری اغلب سالم ابو مسلم خراسانینك رفقاسندن اولمغله، خلفای عباسیه طرفندن زاب و الیلكنه نصب و اعزام اولنمشیدی.‌بعده افریقیه ده تونس و طرابلسده اباضه وساىٔر بربر فرقه لری ظهور ایتمكله، اغلب سالم قتل اولنمش؛ و افریقیه و الیلكنه بشقه لری تعیین اولنوب، نهایت هارون الرشیدك زمان خلافتنده نوبت ولایت محمد بن مقاتله كلمشیدی؛ و او صره ده صاحب ترجمه ینه زاب ناحیه سنك رأس اداره سنده بولنیوردی. مرقوم محمد بن مقاتل ظالم وبد خصال بر آدم اولدیغندن، عسكر و اهالی كندیسندن دلكیر اولوب، (تمام بن تمیم تیمی) اسمنده بر شخص خروجله، قیروانی ضبط ایده رك، محمد بن مقاتل اخراج و طرد ایتمش ایسه ده، ابراهیم بن اغلب زابدن عسكر سوق ایدوب، قیروانی استخلاص، محمد بن مقاتلی طرابلسدن اعاده ایله، تمام بن تیمی و طرفدارلرینی تنكیل ایده رك، ١٨٣ تاریخنده اعادۀ صلح واسایشه موفق اولمشدی. بونك اوزرینه اهالی و عسكر طوپلانه رق، كندیسنه دخالتله، افریقیه و الیلكنی مقام خلافتدن طلب ایتمكه تشویق و اجبار ایتمشلر : و بونك اوزرینه ابراهیم بن اغلب مصر اموالندن افریقیه یه سنوی ویرلمكده اولان مصر اموالندن افریقیه یه سنوی ویرلمكده اولان یوزبیك دنیاری ترك، و بالعكس بهر سنه افریقیه دن قرق بیك دنیار اعطا ایتمك شرطیله، افریقیه و الیلكنك كندیسنه احاله سنی هارون الرشیددن طلب ایتمكله، ١٨٤ تاریخنده ولایت مذكوره كندیسنه

احاله اولنمشدر. ابراهیم بن اغلب ضبط وربط واسایشی بر درجه دها تأمین ایله، قیروانك قربنده‌ (عباسیه) شهرینی بنا و مقر اتخاذ ایتدیكی كبی، قیروابك قارشیسنده اوله رق، مؤخراً خلفلرینك مركب اتخاذ ایتدكلری (قصر قیروان) قصبه سنی دخی تأسیس ایتمشدر. تونسده ظهور ایدن (حمدیس) ی قهر و تنكیل ایتدیكی كبی، مغرب اقصاده علویلك دعواسیله ظهور ایتمش و هارون الرشیدی خیلی اندیشه یه دوشورمش اولان ادریسیلرله ده اوغراشمش؛ و ١٨٩ ده عصیان ایله و الی بولنان سفیان بن مهاجری طرد ایتمش اولان طرابلس غرب اهالیسنی دخی اطاعته ارجاعه موفق اولمشدر. ١٩٥ ده تونسده عمران بن محالد عصیان ایده رك، قیروانی ضبط، و ابراهیم بن اغلبی عباسیه ده محاصره ایتمكله، بر سنه محاربه دن صكره، ابراهیمه مركز خلافتدن نقداً امداد كلمكله، عطیه واحسانله خصمنك عسكرینی دخی جلب ایده رك، فتنه یی یكیدن تسكین ایتمش؛ و طرابلسده یكیدن ظهور ایتمش اولان عصیانی باصدیرمغله مشغول ایكن، ١٩٦ تاریخنده وفات ایدوب، اوغلی ابوالعباس عبدالله بن ابراهیم یرینه كچمشدر. _ [بو دولتك احوال عمومیه سیچون ((اغلب)) ماده سنه مراجعت بیوریله.]