آير

Osmanlica ansiklopedi kamus alemde آير maddesi. Sayfa:517


Air - آير

یاخود آهیر آفریقاده كی صحرای كبیرك اورته سنده و فزان ایله سودانك خوصه مملكتی آره سنده واقع بر خطۀ واسعه در، كه ْ٢۰ ایله ْ١٦ عرض شمالی آره سنده

اولوب، شمالدن جنوبه اولان بویی ٤٥۰ كیلومتره، و شرقدن غربه اولان اكی دخی خیلی واسعدر. بو خطه صحرای كبیرك یانمش وقورو قوملری آره سنده بر باغچه كی اولوب، آفریقانك اسویچره سی دنیمكه شایاندر؛ و درت بش بیك متره ارتفاعنده طاغلری اولوب، بو طاغلردن آقان بر طاقم نهرلر و طاغ واورمانلرك جلب ایتدیكی یاغمورلر اكثر طرفلرینی داىٔمی صورتده زمرد حالنده بولندیریور؛ ویالكز طاغلرك یوكسك جهتلری قیالق وقورو بولنیور. اهالیسی بربر اقوامندن اولوب، زنجیه جاریه لر استفراشی عندلرنده مرعی بولنمق سببیله، رنكلری زیاده جه اسمردر. بونلر یرلی ایسه لرده، زراعتله اشتغال ایتمیوب، ینه خیمه نشینلر كی باشلیجه حیواناتله مشغول اولورلر، و كویلرك اطرافنده كلیتلی دوه و ایكی اوركوجلی صیغیر سوریلری كوریلور. باشلیجه غدالری اولان داری یی سوداندن آلیرلر، و مقابلنده (تیبو) مملكتندن آلدقلری طوزی كوتوروب صاتارلر. مركزلری (آغادس) شهریدر، كه حاكملرینك مقریدر. ب شهر مقدما آفریقای وسطیجه بیوك بر تجارتكاه اولوب، شمدی خیلی تدنی ایتمش ایسه ده، ینه اون بش بیكدن زیاده نفوسی واردر. طرابلس غربله جزایر وفاسدن سودانه كیدن كاروانلرك اكثریسی بو قطعه نك ایچندن كچرلر. سودانیلر بوكا (آسبن) اسمنی ویریورلرسه ده، بو اسم اصل مملكتك اولمیوب، طاغلرندن برینك اسمیدر. (آیر) اسمی علمای عربك جغرافیا و سیاحت كتابلرندن آلنه رق، آوروپا خریطه لرنده اسكیدن موجود ایدیسه ده، مملكتك احوالی مجهول قالمشیدی. نهایت بوندن ٣٨ سنه اول (دوقتور بارد) اسمنده بر انكلیز سیاح آفریقای شمالی و وسطیده ایتدیكی سیاحت اوزرینه یازدیغی سیاحتنامه ده احوالی تفصیلاً بیان ایتمشدر.

Kamusul Alamde Air maddesi, آير osmanlica tarih ve cografya ansiklopedisi Air nedir anlami. hakkinda bilgi



7 14 21 28 35 42 49 56 63 70 77 84 91 98 105 112 119 126 133 140 147 154 161 168 175 182 189 196 203 210 217 224 231 238 245 252 259 266 273 280