amour - آمور

مادۀ آنفه ده بیان اولنان (آمور) ایرماغنك شمال طرفنده واقع بیوك بر قطعه در، كه ١٨٥۰ تاریخ میلادیسنه دك اسماً چینك النده ایكن، تاریخ مذكورده روسیه نك ید ضبطنه چكوب، سیبریایه الحاق اولنمشدر. آمور نهرینك حوضه سی تقریباً ۰۰۰ ١٩٤ مربع كیلومتره اولوب، فرانسه نك اوچ بچق مثلی بسبتنده اولدیغی حالده، روسیه نك الینه چكن آمور قطعه سی بونك نصفی نسبتنده، یعنی تقریباً ٩٧۰۰۰۰ مربع كیلومتره وسعتنده اولوب، ْ٤٣ ایله ْ٥٦ عرض شمالی و ْ١٢۰ ایله َ٣۰ ْ١٣٩ طول شرقی آره لرنده ممتد اولور. بوكا ملحق اولان (سخالین) آطه سی بو حسابه داخل دكلدر. شمالاً ((شرقی سیبریا)) ایله وشمال غربی طرفندن (داوریه) ونام دیكرله ((ماوراء بایقال)) قطعه سیله محدوددر. جنوب و غرب جنوبی طرفندن، یوقاریده ذكر اولندیغی كبی، آرغون، آمور و اوسوری نهرلریله چینك النده اولان مانچوریان آیرلمش؛ و شرق جهتنده مذكور آسوری مجراسی بوینجه جنوبه طوغری اوزانه رق، (قوریا) نك حدودینه منتهی اولمشدر. شرق و شرق شمالی طرفی ایسه جاپون و (اوخوچق) دكیزلریله محاط اولوب، كیرنتی و چیقنتیلری حساب اولنمقسزین، تقریباً ٢۰۰۰ كیلومتره لك سواحلی واردر. آمور قطعه سی عمومیت اوزره طاغلق بر محل

اولوب، حتی ایرماغك كنارلرنده بیله دوز یرلری پك آزدر. همان هر طرفی یبانی وبالطه كورمه مش اورمانلرله مستور اولوب، شمال طرفی یالكز اقالیم بارده یه مخصوص اولان چام وساىٔره آغاجلرینی ویالكز آمور نهرینك جنوبه طوغری تشكیل ایتدیكی قوسك ایچی اقالیم معتدله یه مخصوص آغاجلر انواعنی وحتی بیانی حالنده غایت بیوك آصمه لرله جویز آغاجلرینی وساىٔر اشجار مثمره یی حاویدر. یالكز بو طرفك پك آز یرلرنده جزىٔی بر زراعت اجرا اولنوب، ساىٔر طرفلرده اهالی یازین بالیقجیلق وقیشین آوجیلقله كچینیر. باشلیجه طاغلری ایكی سلسله یه منسوب اولوب، بونلرك بری قطعه نك جهت شمالیه سنده غربدن شرقه ممتد اولان (استاوونوی) سلسله سیدر، كه بحر محیط شمالی ماىٔله سنی (اوخوچق) دكیزی ماىٔله سندن یعنی سیبریایی آمور حوضه سندن آیریور. دیكری ایسه قوریادن كلوب، جنوبدن شماله طوغری امتدادله، او سوری وادیسنی جاپون دكیزندن آیران (سیهانه آلین) سلسله سیدر. وسطلرنده دخی (آلتون نغان) اسمیله بر طاغ واردر، كه آمور ایرماغی بونك اورته سنده واقع غایت كوزل وشایان تماشا بر بوغازدن چكیور. آمور قطعه سنك ساحل شرقیسنده شمالدن جنوبه طوغری طار و اوزون بر جزیره اوزانیور، كه (سخالین) اسمیله معروف اولوب، بو آطه ایله ساحل آره سنده كی بوغازه دخی ((تاتارستان بوغازی)) دیرلر. هواسی جنوب طرفلرنده بر آز دها معتدل ایسه ده، عمومیت اوزره صوىٔوق اولوب، یدی آیدن زیاده سورن قیش موسمنده مقیاس حرارت صفردن آشاغی ٣٥ درجه یه قدر اینر، وكرك ایرماق كرك دكیز طونار. اهالیسی پك جزىٔی اولوب، هر نه قدر مملكتك حال حاضریله منتظم بر تحریر نفوس ممكن اوله مامش ایسه ده، بتون هالیسنك یوز بیك نفوسی متجاوز اولمدیغی تخمین اولنمشدر. بونلرك دخی نصفی روس اولوب، دیكر نصفی بالیقجی وچوبان قبیله لرندن عبارت اولمق اوزره، اوچ جنسیته منسوبدرلر. قسم اعظمی تاتار جنسیتی شعباتندن اولان (تونغوز) قومنه منسوب اولوب، یالكز جنوبه طوغری ممتد اولان سلسلۀ جبالك غرب طرفنده یعنی اوسوری نهری وایسنده ینه اقوام تاتاریه دن (مانچو) قومنه منسوب بر قبیله، و سلسلۀ مذكوره نك

دكیز طرفنده اولان ماىٔله سنده دخی جاپون وقوریا اهالیسیله قرابت جنسیه سی بولنان دیكر بر قبیله ساكن بولنیور. روسلر بو قطعه یی ایكی اداره یه تقسیم ایدوب، اصل (آمور) نامیله یاد ایتدكلری قسم غربیسنه یكیدن تأسیس ایتدكلری (بلاغووچنسك) قصبه سنی مركز اتخاذ ایتمشلردر. قسم شرقیسنی ایسه ((ساحل)) نامیله تفریق ایده رك، ایكی قضایه آیرمشلردر، كه بونلردن برینك مركزی (نیقولایفسك) ودیكرینك كی دخی (صوفیسق) قصبه لریدر. روسلر دها بر طاقم قصبه لرك رسملرینی چیزوب، اساسلرینی قورمشلر، واسكانلرینه خیلی غیرت ایتمكده بولنمشلر ایسه ده، الآن او واسع مملكت خالی حكمنده در.