آمور

Osmanlica ansiklopedi kamus alemde آمور maddesi. Sayfa:381


Amour - آمور

آسیانك شرق طرفنده بر بیوك ایرماق اولوب، ایكی بیوك نهردن مركبدر، كه بونلرك بری (آرغون) یاخود (اورخون) ودیكری (شیلقه) نهرلری اولوب، ایكیسی ده (قنتای) طاغلرندن نبعانله، (داوریه) اووه سنی سقی ایتدكدن صكره، ً٤٥ َ١٩ ْ٥٣ عرض شمالی ایله ً٤٥ َ٢٩ ْ١١٩ طول شرقیده، بالاجتماع، ١٢٨ كیلومتره لك محلده شرقه طوغری اولان جریاننده دوام ایدر؛ بعده جسیم بر قوس چیزمك اوزره شرق جنوبی یه طوغری میلانله، ْ٥٣ عرض شمالیدن ْ٤٨ عرض شمالی یه قدر ایتدكدن صكره، ساحله تقرب ایتدكجه، ینه شرق شمالی یه طوغری چیقه رق، تقریباً ْ٥٣ عرض شمالی ایله ْ١٣٩ طول شرقیده (اوخوچق) دكیزینه منصب اولور. آرغون ایله شیلقه نك محل تلاقیسندن آشاغی اولان (آمور) مجراسی ٢٨٤۰ كیلومتره طولنده اولوب، كاملاً سیر سفاىٔنه صالحدر. آرغون وشیلقه نك منبعىٔدن حساب اولندیغی حالده، بتون مجراسی ٤۰۰۰ كیلومتره دن زیاده، یعنی طونه نك ایكی مثلی اوزونلغنده در. آمور نهری مجراسنده صاغ وصولدن بر چوق نهرلر وچایلر احذ ایدر. كه بونلرك بعضیسی خیلی بیوكدر. شمالدن آلدیغی نهرلرك اك بیوكلری روسیه نك اخیراً ضبط ایتدیكی آمور قطعه سنی سقی ایدن (زیا)، (بوریا) و (آمغان) نهرلریدر. جنوبدن آلدیغی نهرلرك اك بیوكلری دخی (سونغاری) ایله (اوسوری) نهرلریدر. علی الخصوص (سونغاری) نهری بتون مانچوریانك صو-

لرینی جمع ایتمكله، بر بیوك ایرماق صورتنی آلوب، محل تلاقیسنده صویی (آمور) ك صویندن زیاده كورینور. بو نهرك وادیلری مانچوریانك اك مسكون یرلری اولوب، الیوم چینده حكومت سورن خاندان حكمداری دخی اورادن نشأت ایتمشدر. ابتدا (آرغون) بعده (آمور) و نهایت (اوسوری) نهرلرینك مجرالری روسیه ایله چین آره سنده خط حدود یرینی طوتیور. آمور نهرینك صویی سیاهمتراق اولدیغندن، مانچو لساننده (سخالین اولا) ومغولجه ده (قره موران) تسمیه اولنمشدر، كه ایكیسی ده ((قره ایرماق)) دیمكدر. اوروپالیلرجه تعمم ایدن (آمور) اسمی ایسه ((ایرماق)) دیمك اولان (موران) اسم مغولیسندن غلطدر. سونغارینك صویی ایسه بیاضمتراق اولدیغندن، مانچو لساننده (سوت ایرماغی)) دیمك اولان (سونغاری اولا) دینلمشدر.

Kamusul Alamde Amour maddesi, آمور osmanlica tarih ve cografya ansiklopedisi Amour nedir anlami. hakkinda bilgi



1 8 15 22 29 36 43 50 57 64 71 78 85 92 99 106 113 120 127 134 141 148 155 162 169 176 183 190 197 204 211 218 225 232 239 246 253 260 267 274 281