Arya - آريا

(یاخود) بو اسم یونان قدیم جغرافیونی طرفندن هرات شهرینه وخراسانك قسم شرقیسیله سیستانه ویرلمش، وبعض دفعه تاهند حدودینه قدر بتون افغانستان وبلوجستانه دخی تعمیم ایدلمش ایسه ده، اصل بلخ ایله هرات طرفلرینك اسم قدیمی اولدیغی مظنون اولوب، انساب امم والسنه ایله توغل ایدن متأخرین علما طرفندن پك اسكی بر زمانده اورالرده ساكن بولنمش واورادن هند وایران وبتون اوروپایه شعبه لر صالمش اولان بر قوم قدیمه دخی ویرلمشدر. آریا مملكت قدیمه سی نوع بشرك بشیكی دكلسه ده، مدنیات بشریه نك اك اول ظهور ایتدیكی یر عد اولنه بیلیر. اقلیم وموقعی اقتضاسنجه اهالیسی نوع بشرك ساىٔر كافۀ اقسامندن زیاده تناسب اعضا وذكاوته مالك اولوب، جمله سندن اول اویانمش؛ واو وقتلرده اكثر انسانلر چوبانلق وآوجیلقله یاشایوب، كوجبه حالنده طولاشدقلری حالده، اك اول بونلر كویلرده اسكان ایدوب، زراعتله اوغراشمغه باشلامشلردی. زراعت

آوجیلق وچوبانلق كبی تهلكه واجل قضایی موجب اولمیوب، بریرده اقامتی دخی متلزم اولمغله، نفوسك تكثرینی موجب اولدیغندن، بونلر مرور زمانله چوغالوب، آسیای وسطینك مركزی دیمك اولان مذكور ممكتده صیغه مامغه باشلاینجه، زراع ایده جك اراضی تحریسیله اطرافه طاغلمغه مجبور اولمشلردی. ایشته بو وجهله آریاامتندن وقت وقت برر قوم وقبیله آیریلوب، زرعه صالح اراضی بولنجه یه قدر كیدر؛ واورالرده بولدیغی آوجی وكوجبه اقوامله غوغا ایده رك، غالبیته ناىٔل اولنجه، یرلشیر؛ ومغلوب اولدیغی تقدیرده دها ایلری یه سورردی. لكن بو اقوام بر وقتده تفرق ایتمیوب، مختلف زمانلرده طاغلمش، وبو صورتله آیریلان قافله لرك هجرتلری آره سنده عصرلر چكمشدر. بوندن ماعدا، بونلر اوزاق یرلره كیتمزدن اول، آسیای وسطی وایرانك هر طرفنه یاییلوب، جیخوندن دجله و فرات مجر الرینه قدر اولان یرلری قاپلامش اولدقلرندن، وبربرلرندن اوزاق دوشدجكه، مرور زمانله لسانجه دخی بینلرنده بر درجه‌یه قدر مختلف ظهور ایتمش اولدیغندن، بعده اوزاق محللره هجرت‌ ایدن قافله لرك هر بری بومملكت واسعه نك بشقه برطرفندن چیقمشدر. بو وجهله بینلرنده زمان ومكانجه بر اوزاقلق بولنوب، لسانلری دخی تا او وقتدن بسبتون متحد دكلیدی. شوراسنی ده اونوتمیه لم كه : بو وجهله هجرت ایدن آریا اقوامندن تا اوروپانك منتهای غرب ویا شمالنه قدر كیدن قوملر بو اوزون سفری یكدن وقصداً اختیار ایتمیوب، ابتدا یقین محللره یاپلمش، واورالردن بشقه اقوام طرفندن صیقیشدیرلدقجه، دها ایلری یه كیتمكه مجبور اولمشلر. وبو اوزون سفرلرینك هر برمنرلنده عصرلرجه طورمشلردر. مثلا (كلت) قومنك بقیه سی كون آنجق اوروپانك منتهای غربنده بولندقلری حالده، ایكی بیك وایكی بیك بشیوز سنه اول طونه وقره دكیز ساحللرنده دخی بولنمش اولدیغی تاریخله مشبت اولدیغی كبی، قافقاسیه ده دخی بونلرك بر وقت ساكن بولنمش اولدقلرینه دلالت ایدر آثار واردر. حالبو كه بو قومك قافقاسیه دن انكلتره یه قدر اولان قطعه یی احاطه ایتمسی ممكن اولمیوب، بلكه بو یولده چكركن هر منزلده عصرلرجه طورمش، واحتماله كوره منزللرك بعضیسنده بعض افرادی قالمشیدی.

احتماله كوره، آریا امتندن اك اول ایكی شعبه آیریلوب، بری غرب جنوبی یه طوغری یاییله رق، ایرانی قاپلامش، و (آریا) كلمه سیله مناسبت ومشابهتی دركار اولان (ایران) اسمیله تسمیه اولنمش؛ ودیكری جنوب شرقی یه طوغری ایندرك، هنده دخول ایتمش، و اوراده پك چوق وقت (آریا) اسمنی محافظه ایتمشدر. هندده اولدن بولنان اهالی زنجی یه قریب سیاه وزراعتدن بیخبر بولندقلرندن، آریالر اراضی یی اللرینه چكیرمش، ومملكتك صاحبلری اولوب، یرلی اولان وحشی وسیاه آدملرله قاریشمغه تنزل ایتمدكلرندن، آیریجه بر صنف حالنده یاشامشلردر. بونك ایچون اسكی (سانسكری) لساننده (آریا) كلمه سی هم ((صاحب اراضی)) وهمده ((اصیل، حر، چلبی،)) معنالرینی بیان ایدر. علمای لسانیونك بعضیسی (آریا) اسمنك اصل معناسی بو اولدیغنی ادعا ایتمشلر ایسه ده، بو معنا آریالرك هندده آلدقلری صفتدن حاصل اولمش بر معنای مجازی اولوب، اصل (آریا) اسمی، ((آربانیا)) ماده سنده دخی بیان ایتدیكمز اوزره، ((تارله))‌ دیمك اولان (آر)‌ كلمه سندن مشتقدر. بو كلمه، (آر)،(ار) ویا (ایر) صورتنده اوله رق، آریا اقوامندن اكثریسنك اسملری تركیبنده كورلمكده در. ایران طرفلرینه یایلمش اولان آریا اقوامندن ایكی قوم، اقوای احتماله كوره، مازندران وطبرستان طرفلرندن آیریلوب، بربرینی متعاقب، قافقاسیه وبحر سیاه سواحلی طریقیله تدریجی تدریجی آوروپایه صوقلمشلردر. بوایكی قومك بری (كلت) ودیكری (پلاسج) قومیدر. كلتلر یا پلاسجلردن ویاخود ساىٔر اقوام طرفندن سوریله رك، اوروپانك غرب طرفلرینه چكلمش، وپلاسجلر دخی اوروپانك شرق جنوبی طرفلریله آناطولینك بر قطعه سنده یرلشمشلردی. دیكی ایكی قوم دخی جیخون وسیخونی تجاوزله، بر چوق وقت ماوراء النهر وخوارزم‌ طرفلرنده اسكاندن صكره، غرب شمالی یه طوغری ایلریلمكه مجبور اولوب، بونلردن (توتون)‌ لر یعنی اسكی جرمنلر اوروپانك شمال غربیسنه قدر ایلریلمشلر؛ و (اسكیت) لر یعنی اسلاولر دخی اوروپانك شرق شمالیسنده قالمشلردر. ایشته اوروپایه كلن بیوك آریا قوملری بو درت قومدن عبارت اولوب، آنجق بونلردن اول بعض كوچك قافله لر كلمش اولدقلری كبی، بونلردن صكره

دخی بویله بعض كوچك قافله لر كلمشلردر، كه بونلرك اك مهملری یونانیلرله لاتینلر اولوب، پلاسج اقوامیله ده قاریشمشلردر. آریا قوم قدیمنده منشعب اولان اممه ((امم آریه)) ویا ((آریانیه)) دنیلدیكی كبی، بونلرك ازمنۀ مختلفه ده سویلمش اولدقلری لسانلره دخی ((السنۀ آریه)) ویا ((آریانیه)) دنیلیر. بو كونكی كونده موجود اولان امم آریه وجه آتی اوزره منقسمدرلر : هند شعبه سی { هندلیلر،چنكانه لر ایران شعبه سی { ایرانیلر،افغانیلر،كردلر،ارمنیلر كلت شعبه سی { كومریله { غال كلتلری،برتانیا }} { غاللر { اسقوچیا}} ایرلانده }} مان آطه سی }} لاتین شعبه سی { ایتالیانلر،اسپانیوللر، پورتكیزلیلر، فرانسزلر، غریزونلر، رومانیالیلر یونان شعبه سی روملر پلاسج شعبه سی آرناؤدلر اسكیت شعبه سی { لتلر { لیتو آنلر، لیوونلر اسلاولر { روسلر، لهلیلري ،چهلیلر، اسلوواقلر ، صربلیلر،خرواتله، واسلاوونلر توتون شعبه سی { غوتله { آلمانلر، انكلیزلر، فلمنكلیلر، فریسونلر اسقاندیناولر { دنیمارقه لیلر، اسوجلیلر، نوروجلیلر، اسلانده لیلر بو وجهله بوكونكی اوروپاده بولنان اقوامدن یالكز تركلر، بلغارلر، مجارلر، فنیوآلر، وباسقلر اقوام آریه دن اولمیوب، بونلردن پیرنه طاغلرینك

اتكلرنده بولنان باسقلرك اوروپانك اقوام آریه كلمزدن اول كی اهالیٔ قدیمه سی جنسندن اولدقلری ملحوظ، ولسانلری مجهول ومنقرض بر زمره یه منسوبدر. دیكرلری ایسه اقوام تورانیه دن اولوب، آنجق بلغارلر كندی لسانلرینی تركله، اسلاوجه سویلمكه آلیشمش اولدقلرندن، نسلاً دكلسه ده، لساناً اسلاولره التحاق ایتمشلردر. السنۀ آریه دخی وجه آتی اوزره منقسمدر: شعبه طاقم السنۀ قدیمه السنۀ جدیده هند ۰۰۰۰۰ { اسكی سانسكری هندوستانی(اردو) بنكالی، جكرانی، نپالی، كشمیری، ملتانی، سندی، چنكانه جه، یكی سانسكری پالی پركری كلت { كومری ۰۰۰۰۰۰۰ { غالجه، برتانجه، قورنیك، غال ۰۰۰۰۰۰۰۰ { اسقوچیا لسانی { ایرلانده }} مان آطه سی }} پلاسج ۰۰۰۰۰ { ایلریا لسانی،ماكدونیا }} تراكی }} فریجیا}} آرناؤدجه یونان ۰۰۰۰۰ { یونیا لسانی، دوریا }} اىٔولیا }} رومجه ایتالیا ۰۰۰۰۰ { لاتینجه { اوسقجه، اومبرجه { ایتالیانجه، اسپانیولجه، پورتكیزجه، فرانسزجه، پروو انسنجه، غریزونجه، رومانجه توتون { غوتجه آلمانجه، فلمنكجه، انكلیز جه اسقاندیناو { نوردجه اسوججه، نوروججه، دانیمارقجه، اسلاندجه

اسكیت { اسلاو { مشترك اسلاوجه روسجه، روتنجه، لهجه، چهجه، اسلوواقجه، اسلاوونجه، صربجه و خرواتجه، بلغارجه لت ۰۰۰۰۰۰۰۰ { لیتو آنجه، لتجه ، اسكی پروسجه بونلردن ماعدا ایتالیانك شمال طرفلرینك لسان قدیمی اولان (اتروسكجه) ایله رومانیانك لسان قدیمی اولان (داچجه) نك دخی آریا لسانلرندن اولدقلری متفق علیه ایسه ده، بونلرك خانغی قسم وشعبه یه ملحق اولدقلر الآن آكلاشیله مامشدر. یوقاریكی جدولدن آكلاشلدیغی اوزره، دنیانك اك مهم لسانلرینك اكثریسی آریا زمره سنه منسوب اولوب، اوروپا اممنك همان جمله سی دخی آریا امت قدیمه سندن منشعب بولندقلرندن، بو حقیقتك كشفندن بری اوروپا علما ومحققینی برفن مخصوص اتخاذ ایده رك، توسیع وتعمیقیله اوغراشمقده درلر. السنۀ آریه بیننده كی مناسباته داىٔر یازیلان آثارك اك مشهوری موسیو (پوپ) ك یازدیغی ((مقایسه لی صرف)) كتابیدر. جنوه علماسندن بش سنه‌ اول وفات ایدن موسیو (پیقته) آریا قوم‌ قدیمنك احوالیله اقوام آریه نك هجرتلری حقنده مكمل ومفصل بر كتاب یازمش؛ وبو كتابده كافۀ السنۀ آریه نك اصلی اولان آریا لساننی دخی، اوندن متولد اولان السنه نك یاردیمیله، كشف واحیا یه اوغراشمشدر.